Make money doing the work you believe in
الفصل بين الواجب والمشاعر تجاه الواجب صعب جدًا، لكن إذا صار بالشكل الصحيح الحياة تمشي بشكل جيد جدًا
أتذكر أول مرة جربت شعور الفصل بين مشاعري والواجب علي يوم تهاوشت مع إخواني الصغار، لكن في نفس الوقت كان لازم أدرسهم عشان عندهم اختبار…
ما كنت أشوف مشكلة بالموضوع لين لاحظت إن إخواني يوم يبوني أدرسهم بعد ما نتهاوش يجوني مجبرين يحاولون يعتذرون مني عشان أساعدهم
ذاك الوقت يمكن كان عمري 14، وحسيت بشعور سيئ جدًا وقد إيه إن الإنسان ممكن يحس بالنقص لأن في واحد عنده العلم وهو مضطر يجاريه عشان يخلص اللي يبيه،
مع إننا إخوان والأمور مو بذاك السوء وكلنا أصلًا أطفال
لكن شعور إن أحد وده يهبدك لكنه يتنازل عن شيء من كرامته لأنه محتاجك شعور بشع جدًا جدًا
أكره شعور الاحتياج، وأقدر كرامة الإنسان بشكل فضيع، لأني ما أتخيل في يوم أنحط بنفس الموقف وألقى نفسي بين خيارين يا كرامتي، يا شيء أحتاجه جدًا
وفوق هذا لما يعتذرون مني كان اعتذارهم كذب بس عشان الأمور تمشي وأنا أبغض هذا الاعتذار
يا اعتذار من قلب، يا بلاه
لذلك حطيت قانون بيننا مشاكلنا مستحيل تدخل بالدراسة
عادي أكون زعلانة منك، لكن لما تجي وتطلبني أدرسك أنسى كل شيء ذيك اللحظة وندرس، بعدين نقفل الكتاب ونرجع نزعل من بعض !
أول مرة تهاوشنا بعد هذا القرار، يوم جو يكلموني قالوا أنتِ قلتي كذا - ذكروني بكلامي اللي ما نسيته أصلًا - وأنا عندي اختبار بكرة وأحتاج مساعدة
بدون أي اعتذار كاذب، الصدق كان الشعور متضارب جميل لأن ما خليت حاجتهم تفوز على كرامتهم وسيئ لأن ودي أفجر رأسك الحين، شلون تبيني أدرسك
لكني سكت وقلت تمام ، ودرسنا وكل شيء
لكن لاحظت شيء بعد، أثناء الدراسة شعوري قاعد يخرج ولو بشكل بسيط جدًا، وهذا يأثر على جودة المذاكرة ونفسيتهم وهم يدرسون…
لذلك وصلت لقرار، وما كان سهل أبدًا، إني راح أنسى فعليًا فعليًا كل المشكلة اللى بيننا ذيك الفترة وندرس وبعدها نشوف هل راح نكمل زعلنا أو هل راح نتناقش عن الموضوع أو هل راح نرضى عن بعض…
وفعلًا مع التكرار والمحاولات بيني وبين نفسي والسيطرة على المشاعر قدرت أفعل هذي الخاصية - ولو إني ما جربتها على نطاق واسع لسى، ويمكن تفشل مع ضغط أكبر، لكن مبدئيًا أحسها ناجحة -
صرت أفصل بين الواجب وبين شعوري تجاه الشخص…
وأحس فعلًا إن هذا من أفضل الأشياء اللي قدمتها لنفسي لأن حفظ كرامة الإنسان من أنبل الصفات اللي بالعالم وما كان سهل الموضوع، لكن الفضل لله دائمًا وأبدًا