A Chilly night in berlin 

Germany ka sabse prachalit sheher , berlin , yakeen nahi hota jiss sheher ke baare me maine kitaabon me itna padha , aur yahi wo sheher hai jahan pe pichli sadi ka sabse bada tanashah raha karta , jiss road par main chal rha hoon shayad isi kisi road ke neeche uska bunker hoga jisme usne aakhri lamhon me shaadi kari aur phir apne aap ko goli marli , uss ghatna se 70 saal baad main akele iss sheher me raat me electric scooty se ghoom rha hoon , ek samay par hitler ka sheher kehlaye jaane wala sheher , aur phir uske baad ek deewar ke zariye manviya aarthvyavastha ke do prakhar namumne pesh karne wala sheher , aaj is 21vi sadi me apni extra liberal sexual parties aur ek ajeeb sa sangeet , use sangeet kehna mere liye hi apne aap me ek yaatna hai , techno music ke liye prachlit hai , duniya bhar se log iss sheher me itihaas dekhne aate hain aur bhavishya dekh ke jaate hain , accha sheher hai , main 2 din se iss sheher me akela ghoom raha hoon , main jin doston ke yahan reh raha hoon wo iss sheher se door ek ganv me rhte hain , mere hum umr hone ke bawajood wo dono ekdum ek buddhe couple ke tarah rehte hain , sharaab peete nahi , vyasan karte nahi , saath me khana banate hain , apna apna kaam karte hain aur so jaate hain , accha hai ye bhi , lekin main apne jeevan ke pahle europe trip me shaam ko 8 baje sone to nahi aaya hoon . 

Dinbhar alag alag cheezein aur khuli hawa aur aasmaan ko apne phenpdo me samane ke baad main akele ek hukkah lounge me jaake baith gaya , turkey ke log accha hukka banate hain , darasal meri ek kink club me booking 9 baje ki hai aur mujhe tab tak ka time kaatna hai , berlin me tarah tarah ke mashoor clubs hain jisme 4-4 ghante line lagake log hataash hote hain , mujhe apne aap par poora bharosa hai ki mujhe aise kisi club me entry nahi milegi , to maine koshish bhi nahi ki hai , maine ek chota sa first copy club dhundha hai jahan par bheed bhi kam hai aur entry milne ki sambhanvayein zyada , hukka khatam karke apne koi mil gaya wale scooter par , jaise taaise main uss club me pahuncha , security guard ne meri dasha dekh kar , ek hoodie aur sweatpants , indian shakal ka insaan jisne 20 din se dadhi banayi nahi hai aur jiski daadhi dhang se aati nahi , jitni aati hai utni kharab lagti hai , usne mujhe mere paise wapas dena munasib samjha lekin andar nahi jaane diya , wo itna zyada bada insaan tha ki mera man bhi nahi hua ki usse kisi tarah ki behes karun , upar se main germany me itne din bita ke germany ke khane ke rookhe hone ka karan samajh chuka tha , aur saath hi saath galti se maine apne school me world war 2 ka chapter dhang se padha tha to german logon se thoda khauf tha hi , hataash hokar main sadak par scooter se wapas berlin ke main station jaane laga , theek thaak thand ho rhi hai , berlin ki sabse mashoor sadak par log ab clubs se nikal rhe hain , shayad clubs band hone ka waqt hai , mujhe club ke band hone ke baad club se nikalne wali prajati badi pasand hai , ab inhe itne nashe ho chuke hain ki ye na ghar jaa sakte hain aur na hi kahin aur , main sabko observe karte hue apni scooter chala rha hoon , thodi der main ek coffee lene ke liye ek counter pe rukta hoon , main jabse europe aaya hoon isi baat se achanbhit hoon ki yahan par har kahin coffee machine lagi huin hain , kabhi kabar to bas machine ke andar se cup girta dekhne ke liye coffee le leta hoon . main apna phone kholta hoon , maine uski stories mute ki hui hain , mere baski nahi hai uske jeevan ko dekhna , uski har story me aisa lagta hai wo apne premi ke saath hai , aur mere hisse ka prem uske premi ko dugna hokar mil raha hai , scooter chalate chalate main story khol leta hoon , uski khudki photo hai , bhagwaan ka shukar hai , warna aaj ki raat uske premi ki shakal dekh kar phir uski shakal ko duniya ki sabse kharab shaklon me shumar karke guzarti , uski photo to acchi hai , aaine ke  samne khadi hai , iss tarah ki photo lene ka use khaasa shauq hai , shayad wo apne aap ke aks me apni sari majbooriyan aur pareshaaniyan mehsoos nahi karti , uske seene pe paani ki chinte hain , shayad abhi naha kar aayi hai , par baal to bheege nahi hue hain , shayad phir wo paseena ho , acchi tasveer hai , prem samapt hone k