كنت رايحة لمكتبة تبيع كتب مستعملة، والمكان فيه شعور غريب كأن كل شيء مر عليه وقت طويل وبقي أثره فقط.

أمشي بين الرفوف وأسحب كتاب بشكل عفوي، أفتحه، وكانت أول صفحة تقابلني إهداء:

"إلى صديقتي.. عسى هالكتاب يخفف عنك"

ابتسمت وسكرت الكتاب.

مسكت كتاب ثاني، ونفس الشي:

"إلى فلان.. لأنك تحب هالنوع من القصص"

هنا وقفت، وصرت أفتح الكتب مو عشان أقرأها، صرت أفتحها عشان أشوف لمين كانت!

كل كتاب فيه اسم وتاريخ وكلمة مختصرة، بس وراها شعور كامل.

شخص اختار كتاب، فكر في أحد، كتب له جملة وقدمه وهو حاس إن اللحظة ذيك كبيرة ومليانة معنى

بس الحين الكتاب نفسه موجود هنا بين مئات الكتب المستعملة، يعني ببساطة العلاقة اللي كانت وراه انتهت أو تغيّرت أو اختفت.

جلست شوي بين الرفوف أحاول أستوعب الفكرة، أنا مو قاعدة أتصفح كتب، أنا قاعدة أمر على بقايا مشاعر.

وهنا جاني تساؤل غريب: هل كل شيء نحسه بصدق لازم يكمل؟

يمكن لا، يمكن الفكرة مو إن الأشياء تنتهي، يمكن الفكرة إن مو كل شعور خُلق عشان يبقى، بعضها خُلق عشان يمر عليك يغيرك ويكمل طريقه.

ومن وقتها صرت أفكر بطريقة مختلفة إن مو كل شيء يروح يعني كان قليل قيمة، بالعكس أحيانًا قيمته كانت في وقته فقط.